MOSKU, RUSIA, AFP.- E diputadonan ruso a aprobá unánimemente un lei ku ta amplia konsiderablemente e alkanse pa prohibí e propaganda di LGTB+, mei mei di un giro konservadó di gobièrnu ruso, ku ta kompañá e ofensivo militar na Ukrania.
E legislashon tin komo ophetivo prohibí kualke menshon di loke outoridatnan ta konsiderá komo propaganda gay den medionan di komunikashon, sine, bukinan i publisidat.
Tambe e ta prohibí e propaganda di pedofilia i e kambio di sekso. Si aprobá e enmienda den parlamento i despues e bira lei pa parti di presidente Vladimir Putin, segun e gruponan di derechi, e prohibishon ta bira efektivo di kualke promoshon públiko di persona LGTB+ na Rusia.
Mòsku tin un lei kontra e propaganda na menornan riba relashonnan LGTB+. E lei nobo ta amplia e regla pa adultonan tambe.
“Kualke propaganda di relashon no tradishonal lo tin konsekuensia”, asina e presidente di Duma Viacheslav Volodin a bisa riba retnan sosial. Segun e proyekto di lei, e ta protehá e muchanan i e futuro di e pais di skuridat ku Merka i Oropa ta propagá.
Rusia ta trata di presentá e relashonnan LGTB+ komo un produkto di e influensia oksidental i e ta hasiendo su retórika fuerte miéntras e ta intensifikando su enfrentamentu ku oksidente pa e konflikto na Ukrania.
