WASHINGTON, AP.- E desishon di presidente di kámara di representante Paul Ryan di tuma distansia di Donald Trump kier purba haña kòntròl republikano di e órgano aki bèk. Su aktitut, no opstante, ta pone stabilidat di su kargo i su futuro ambishonnan polítiko na prueba.
E anunsio di Ryan, ku e no ta bai defendé e kandidato di su partido pa presidensia i su rekomendashon pa aspirantenan republikano di diferente kargo públiko pa buska su propio kaminda pa viktoria, a pone algun profeshonal insinuá ku su reelekshon pa Kámara di Representante no ta bai wòrdu sostené.
“Mirando tur loke ku ta hunga un ròl den e elekshon aki, si Ryan no ta ku Trump, e ora ei ami no ta ku Ryan”. Asina e representante Jim Bridenstine a indiká djárason riba Twitter.
Si e republikanonan konservá kòntròl den kámara di representante den elekshon di novèmber, algu ku no ta sigur, Ryan lo mester di mas kantidat di voto posibel di su partido pa mantené su puesto. Esaki ta impliká ku no por permití pa su aktitut desafiante kontra Trump generá desakuerdonan mas grandi.
Ryan di 46 aña, tabata kandidato republikano pa visepresidensia na 2012 i por buska presidensia den futuro. Un derota den kámara di representante por kompliká su ambishonnan polítiko.
