NASHON UNI, AP.- E sekretario general di Nashon Uní Ban Ki-moon a felisitá e presidente kolombiano Juan Manuel Santos deskribiendo e “gran viktoria pa Colombia i pa humanidat di e gran tratado di pas ku su gobièrnu a negoshá ku FARC”.
“Bo a sobrepasá tur difikultat, tur atake i bo no a frakasá”. Asina e dirigente di Nashon Uní a bisa na e mandatario. “Ami personalmente tabata testigu di loke bo a hasi”.
E dirigente kolombiano i Ban a papia den un reunion privá ku prensa kaminda Santos a entregá 297 página di e akuerdo, ku nan ta spera ta wòrdu firmá dia 26 di sèptèmber na Cartagena.
Dia 24 di ougùstùs delegadonan di gobièrnu kolombiano i di FARC a sera un proseso di pas eksitosamente ku a pone fin na mas di 50 aña di hostilidat. Pa 2 di òktober lo tin un referèndem programa kaminda kolombianonan ta vota si ta aprobá òf si no ta aprobá e akuerdonan ku FARC i gobièrnu di Colombia a yega na dje.
