DORADO, PUERTO RICO, AP.- Un aña despues di e impakto di orkan Maria, míles di portorikeño a wòrdu obligá pa usa nan plaka di spar, sera negoshi òf wòrdu forsá pa biba ku dañonan struktural debí ku e kompanianan di seguro no a kontestá nan petishonnan.
E tormenta a tuma e kompanianan di seguro pa sorpresa i a laga nan den un krísis finansiero debí ku e negoshinan mester a reakshoná riba 279.000 petishon. “Esaki ta un kantidat ekstraordinario”, segun indikashon di un eksperto. Un kompania di seguro ya a wòrdu deklará bankrut, lagando mas di 1.500 kaso sin resolvé. Mayoria ta teme ku otro kompanianan tambe lo pasa den e mesun eksperensia aki.
“E industria nunka a haña asina hopi kaso”, segun Iraelia Pernas, direktor ehekutivo di Asosiashon di Kompania di Seguro di Puerto Rico. “Niun hende no tabata prepará pa esaki. Ni e gobièrnu federal, ni e kompanianan di seguro, niun hende”.
E Komishon di Seguro di Puerto Rico a emití but kontra shete kompania ku un balor total di 2,4 mion dòler pa esakinan su tardansa pa atendé e kasonan presentá. Tur kompania riba e teritorio merikano tabatin seguro, pero pa algun, e montante no tabata sufisiente.
