WELLINGTON, NEW ZEALAND, AFP.- Por lo ménos seis persona a muri den un kandela ku a kima un hostel di kuater piso den oranan trempan di mainta ayera den kapital di New Zealand.
Por a mira vlam i huma diki saliendo for di e dak di Loafers Lodge hostel den sentro di Wellington durante oranan di anochi, segun 80 bombero i 20 trùk tabata kombatí e kandela.
Polis i servisio di emergensia a bisa ku vários persona a muri i ku a reskatá 52 mas, pero ainda tin desénas di hende pèrdí.
Promé minister Chris Hipkins a bisa ku por lo ménos seis persona a pèrdè nan bida i e alkalde di e siudat a bisa ku e kantidat por sigui subi.
E bosero di polis a bisa ku e kantidat final di morto ta “ménos ku dies” pero te na momentu ku nan haña akseso na e edifisio por determiná kuantu hende a muri. Outoridatnan no sa kuantu hende tabatin den e edifisio promé ku e kandela a kuminsá.
Bomberonan mester a usa un trùk ku trapi pa saka hendenan pega riba dak di e edifisio, segun e komandante di Kandela i Emergensia, Brendan Nally.
No tabatin ‘sprinkler’ den e hostel i e alarma di kandela no a sende outomátikamente, asina Nally a añadí.
