JOHANNESBURG, AP.- E filial nigeriano di Royal Dutch Shell “a oponé ferosmente” kontra un análisis medioambiente i ta skonde informashon ku ta mustra ku míles di nigeriano ta eksponé na supstansianan toksiko debí ku e limpiesa di e derame mas grave di krudo den historia di e pais afrikano a para. Asina un geólogo aleman kontratá pa multinashonal britanik-ulandes a indiká.
E estudio medioambientel a detektá nivelnan “espektakularmente haltu” di kontaminashon, ku tera “literalmente muha ku hidrokarburo”, segun geólogo Kay Holtzman a indiká den un karta mandá na Inisiativa di Mediashon Bodo.
Esnan ku ta biba na Bodo, na sùit di Delta di Niger, kaminda e krudo ta wòrdu produsí, mester partisipá na un eksámen médiko di forma urgente, rekomendá pa e eksperto.
Shell no a duna komentario inmediatamente riba petishonnan.
E limpiesa a para 17 luna pasa komo parti di un akuerdo ekstrahudisial britániko kaminda Shell a paga 83,5 mion dòler na 15.600 piskadó i kampesino pa dañonan di e derame di krudo kousá pa e oleodukto bieu di aña 2008 i 2009 ku a daña míles di hèktar di tereno. E abogadonan a indiká ku esaki tabata un derame ekivalente na 500.00 bari di krudo. Shell a bisa ku tabata trata di solamente 1640 bari i inisialmente a ofresé e komunidat un kompensashon di 50.000 dòler.
E akuerdo a wòrdu logra atraves di e kompania britániko Leigh Day, ku a bisa ku esaki no a risibí ningun karta di Shell pidiendo informashon di Holtzmann. E aleman a wòrdu kontratá pa Shell pa atendé e asuntu di limpiesa.