JARTUM, SUDAN, AFP.- Outoridatnan sudanes a liberá vários polítiko detené despues di e gòlpi di Estado militar di 25 òktober. Esaki a sosodé un dia despues ku a firma un akuerdo entre ehérsito i e promé minister Abdala Hamdok.
A liberá vários lider polítiko inkluyendo un konsehero di Hamdok. Pero no a proveé informashon di e dirigentenan sivil ku tambe a keda detené.
A detené tur riba mardugá di e gòlpi militar, promé ku general Abdel Fattah al Burhan, a anunsiá disolushon di gobièrnu.
Durante e último simannan ku a pasa, e pueblo sudanes a partisipá den manifestashonnan masivo kontra e poder militar i pa protestá pa liberashon di sivilnan detené, apesar di e represhon sangriento ku a laga 41 morto i sentenáres di herido.
E Asosiashon di Profeshonal Sudanes, a bisa djadumingu ku e akuerdo ta un “suisidio polítiko” pa Hamdok. Pero segun analistanan, a logra kalma e komunidat internashonal i mantené kontròl riba e transishon.
E ofisial di gobièrnu merikano i hefe di diplomasia, Antony Blinken a papia ku general Burhan i premier Hamdok djaluna, i a pidi nan pa logra mas “avanse” promé ku reanudá yudansa finansiero na e pais, kual a keda suspendé despues di e gòlpi di Estado.
