FORT-LAUDERDALE, FLORIDA, MERKA, AP.- Polis ta investigá si e hòmber akusá di a provoká un kandela den un moské na Florida, i tambe si esun ku a ehekutá un matansa den un klup nokturno na Orlando tabata forma parti di un konfabulashon.
Polisnan ta purbando di determiná ku ken Joseph Schriber di 32 aña, tabata komuniká kuné promé ku e kandela di djadumingu anochi den e Sentro Islámiko di Fort Pierce. Asina e teniente Adam Goodner a bisa na AP, kende ta hefe di polis di kondado St. Lucie.
E detektivenan a bisa den su formulario di solisitut ku e kámaranan di vigilansia den e moské, kaminda Omar Mateen tabata asistí, a graba na momentu ku e piromano tabata kombersando ku un persona.
‘Esaki ta wòrdu investigá ainda’, asina Goodner a skibi, ningando di fasilitá mas detaye.
Mateen a muri despues di un konfrontashon ku polis dia 12 di yüni, na momentu ku el a tira un kantidat grandi di persona mata. Akinan 49 persona a muri i 53 a wòrdu heridá. Esaki tabata e matansa mas pió den historia moderno di Merka.
Mateen a manifestá su lealtat na e grupo Estado islámiko. Su tata ta entre e multitut di personanan ku ta bishitá e moské ku regularidat na Merka.
