ATHENAS, AP.- E Instituto di Geodinamika ku sede na Athenas a reportá un temblor di magnitut 5,2 ku a tuma liga serka di e siudat di Ioannina, 330 kilometer na nortost di e kapital.
Te ainda no tin indikashon di dañonan i tampoko víktimanan.
E temblor a tuma lugá 11:15 di anochi i e episentro tabatin un profundidat di 17 kilometer. Ku e movementu aki, a sigui algun temblor di magnitut 4,1 i 3,5 den e siguiente ocho minütnan di e temblor original.
E servisio geológiko di Merka a kalifiká e temblor ku magnitut di 5,3
Gresia ta keda den un zona suseptibel di temblor i e sismonan di e magnitut aki ta normal.
