MIAMI, AP.- Maria Vazquez a spera basta largu pa e momentu aki. Desde un dékada, su tienda di regalo na Miami a prepará un pakete spesial di artíkulonan pa selebrá morto di e lider kubano Fidel Castro.
E makutu ta inkluí un bòter ku líkido ku etikèt “habri solamente ora Fidel muri” i un potrèt di e revolushonario ku kachu di diabel na su kabes, un ròl di papel di wc ku su kara di prent riba esaki”.
Vazquez a ofresé su paketenan den un saku chikitu ku etikèt “Biba Cuba Liber” pa 24,99 dòler. E tabatin vários wardá pa ora e momentu yega.
Den su tienda ku ta keda na Havana Chikitu e ta bende bòter di pika ku etikèt “Kima den fièrnu Fidel” i kamisa ku kara di Che Guevarra.
Desde djasabra mainta, a algun ora despues ku a anunsiá morto di Castro, e tienda a bende mas di 250 pakete, siendo ku ántes e tabata bende solamente dos òf tres pa siman.
Despues di e morto di Fidel mayoria kubano a sali riba kayanan pa manifestá su alegria.
Algun kaya despues di Vazquez su tienda, tabatin un kompania di eiskrim ku a agregá un sabor nobo na su variedat di eiskrim. Esaki ta “Bai Fièrnu Fidel” i ta un meskla di chukulati ku promèntè kòrá.
Castro a “muri i mi ta imaginá ku el a bai fièrnu i no shelu. Pues mi a traha e sabor aki p’e”, asina Suzanne Batlle, doño di e lugá di eiskrim a bisa.
