Update:
Wesley Kook, direktor di Selikor den un reakshon breve na EXTRA a duna di konosé ku el a papia ku e trahadónan riba e situashon ku ta surgiendo na e kompania i awor ta sperando un reakshon di sindikato BTG. EXTRA tambe a buska representantenan di BTG pero no ta logrando kontakto ku nan di manera ku no por informa lesadónan di EXTRA kiko ta e motibu dje akshon i posishon di BTG ku ta e sindikato ku ta dirigí e akshon.
ABVO ta buskando mas informashon riba akshon trahadónan Selikor
WILLEMSTAD.-Esnan ku a yega Malpais pa basha sushi awe mainta a topa un situashon un poko konfuso, den sentido ku tin trahadó pero no por basha sushi. Segun hendenan ta puntra a bin komprondé ku Trahadónan lo ta den un akshon na Selikor.
EXTRA a buska kontakto ku direktor di Selikor i otro funshonarionan pa tende kiko ta e situashon real den e kompania ku ta manehá sushi na Kòrsou, pero lamentablemente no tabata posibel haña niun na telefòn. Buskando mas leu EXTRA a puntra sindikato ABVO ku tin representashon di Trahadónan den e kompania. Gregory Wilson, miembro di direktiva di ABVO den deklarashon na EXTRA a duna di konosé ku ABVO a tuma nota di e desaroyonan rondó di Selikor. ABVO ta buskando mas informashon pa wak a base di esei kiko ta bai hasi. Di tur manera e sindikato ta vigilando e situashon.
Den kombersashon ku trahadó di Selikor EXTRA a komprondé ku e akshon lo ta pasobra a surgi un problema serio na momentu ku un hefe a atendé un trahadó ku lo a bandoná su boka di trabou promé ku ora. Aparentemente na momentu ku esei a sosodé emoshonnan a bai haltu entre e trahadó i su hefe. Kosnan a bai asina leu te ku palabranan fuerte a kai i asta menasa. A base di esaki esun ku a risibi menasa a entrega keho na outoridatnan. Direktor lo a kai aden i tuma medida kontra ámbos, tantu e hefe komo e trahadó.
Mas aleu EXTRA a komprondé ku e sindikato BTG no ta di akuerdo ku e akshon di direktor. A base di esei lo a yama Trahadónan den un wèlga pa protesta e desishon di direktor. (foto file)
