BOGOTA, AP.- Tres militar a wòrdu sekuestrá pa miembronan di gueria di Ehérsito Liberashon Nashonal (ELN) den departamento di Arauca na ost di Colombia. Asina a wòrdu informá djaweps.
Den ménos di un siman, ELN a sekuestrá nuebe persona, entre nan shete persona uniformá i dos sivil kontratista di un empresa di komunikashon.
Ehérsito kolombiano a informá den un komunikado di prensa ku e tres militarnan tabata desplasando djárason den un vehíkulo di servisio públiko den un zona di Tame, na Arauca. Aki nan a wòrdu interseptá pa dos persona deskonosí ku a hiba nan un kaminda deskonosí tambe. “E militarnan sekuestrá tabatin pèrmit, nan tabata na sivil i no tabata armá”, asina el a agregá.
Te ainda, ELN no a notifiká òf rechasá e sekuestro di e militarnan aki.
E gobernador di Arauca, Ricardo Alvarado, a bisa na medionan lokal ku outoridat militar a indiká ku segun informenan di inteligensia, e sòldatnan a wòrdu kapturá pa un grupo di ELN, i esaki ta un zona di influensia di e grupo gueriero aki”. El a agregá ku e sekuestronan aki a tuma lugá pa demostrá forsa na momentu ku e diálogonan di pas ta tumando lugá na Habana”.
Siman pasá, e di seis siklo di kombersashon entre e delegadonan di gueria di ELN i gobièrnu di Juan Manuel Santos a terminá. E tema prinsipal, pa yega na un akuerdo konkreto pa un tregua bilateral no a wòrdu resolvé.
Ivan Duque, kende a asumí presidensia djamars, a señalá ku su gobièrnu lo duna un tempu límite di 30 dia pa evaluá e 17 lunanan di kombersashon ku ELN pero a atvertí ku “un proseso kreibel mester sòru pa un final na akshonnan kriminal, ku supervishon internashonal estrikto i tempu definí. Nos kier avansá, pero pa avansá mester mustra bon kla ku e pueblo kolombiano no por wòrdu intimidá”.
ELN a nase na aña 1965 komo un proyekto polítiko anti imperialista inspirá den e revolushon kubano i tin mas o ménos 1.500 kombatiente, segun sifranan ofisial.
