WASHINGTON, AP.- Gobièrnu di presidente Donald Trump a anunsiá djamars ku dentro di seis luna lo pone fin na un plan migratorio ku ta evitá deportashon i duna pèrmit temporal na 800.000 inmigrante tresé sin outorisashon den Merka na momentu ku nan tabata mucha.
“Nos no por permití pa esun ku gusta bini akinan”, asina sekretario di hustisia, Jeff Sessions a indiká, despues di anunsiá e desishon.
Departamento di Seguridat Nashonal a bisa ku e inmigrantenan kende su benefisio ta terminá promé ku 5 di mart 2018, lo tin te 5 di òktober pa un renobashon.
E anunsio a generá protestanan inmediato. Na New York, desena di studiante a wòrdu detené despues ku nan a reuní, teniendo man i gritando na ingles “Indokumentá i sin miedu”.
“Nos kier bisa nos komunidat ku awor ta e momentu pa nos sigui lucha”, segun indikashon di un hóben na The Associated Press. E mehikano di 30 aña, Erika Andiola, a wòrdu detené gritando “Dignidat pa tur hende”.
Trump a defendé su desishon i den un komunikado el a indiká ku “ e no ta bai mesora, pero mas bien lo duna un temporada na Kongreso pa aktua”.
E mandatario a bisa ku e no ta na fabor di kastigá e muchanan pa akshon di nan mayornan pero “e hóbennan merikano tambe tin nan soño ku nan kier realisá”.
E presidente di Kongreso Paul Ryan a ekspresá djamars den un komunikado ku e tin speransa ku “kámara i Senado por logra un konsenso riba e resolushon legislativo permanente ku ta inkluí garantisá ku esnan ku no a hasi kosnan malu por kontribuí na e pais”.
