WASHINGTON, AP.- Presidente Donald Trump a ninga di a traha pa Rusia, durante kontesta na pregunta di periodistanan. El a papia desde Hardin Sùit di Kas Blanku promé ku el a sali rumbo pa New Orleans. Trump a kalifiká eks funshonarionan di FBI i di Sekretaria di Hustisia komo un “sèt di sinbèrgwensa konosí” i “polisnan korupto”.
E mandatario a reakshoná riba un artíkulo di e korant New York Times ku a informá ku outoridat hudisial a kuminsá investigá si Trump a traha na nòmber di Rusia kontra interes di Merka na aña 2017.
“Nunka mi no a traha pa Rusia”, asina el a bisa na prensa. Trump no a rospondé na preguntanan direkto durante un entrevista pa programa Saturday Fox News.
“Mi ta di opinion ku esaki ta e artíkulo di mas insultante ku nan a skibi i si bo lesa esaki bo por konkluí ku outoridat no a haña apsolutamente nada”.
Asesornan di Kas Blanku a lamentá ku e presidente no a ninga e akusashonnan di forma mas kla i enfátiko, segun tres asesor i republikano di Kas Blanku. E trio a papia ku kondishon pa keda anónimo.
