WASHINGTON, MERKA, AFP.- Donald Trump a pone “seguridat nashonal” di Merka na peliger na momentu ku el a keda ku sekretonan nuklear despues di a bandoná Casa Blanca, segun dokumentonan hudisial divulgá djabièrnè.
E èks presidente republikano, ku ta aspirá pa gana un di dos mandato otro aña, ta enfrentá 37 akusashon, entre nan “retenshon ilegal di informashon di seguridat nashonal” i “opstrukshon di hustisia”, segun e akta di akusashon.
Tambe e ta wòrdu akusá ku perhurio i forma un kòmplòt ku su asistente personal Walt Nauta pa skonde dokumentonan ku FBI a pidi. Nauta tambe ta wòrdu akusá.
Trump a anunsiá djaweps ku el a wòrdu akusá pa hustisia federal pa su maneho di archivonan di Kas Blanku, i a indiká ku e mester paresé dilanti di hues na Miami djamars.
“Mi ta inosente”, asina el a bisa i a añadí ku e ta víktima di un maniobra di su atversarionan demókrata.
E prosedimentu a wòrdu deskribí pa su abogado, pero e dokumento hudisial ta keda seyá. Departamento di Hustisia no a bisa nada riba e kaso te ainda.
Lei di Merka ta obligá tur presidentenan pa manda nan e-mail, karchi i otro dokumentonan di trabou na Archivonan Nashonal despues ku nan terminá nan mandato. Ademas, ta prohibí nan di warda sekretonan di Estado na sitionan no outorisá òf no safe.