WASHINGTON, AP.- Presidente Donald Trump a bisa djaweps ku Puerto Rico, fuertemente afektá pa un orkan, no por keda haña yudansa di gobièrnu di Merka “pa semper” i a indiká ku e teritorio merikano tin kulpa di su propio problemanan finansiero.
Vários demókrata na Washington a protestá pa deklarashonnan di e mandatario, igual ku funshonarionan di e isla, desde ku orkan Maria a asotá esaki tres siman pasa, lagando un kantidat di morto i destrukshon di un krísis humanitario.
E alkaldesa di San Juan a bisa tambe via Twitter ku e palabranan di Trump no ta kuadra pa un mandatario, i esakinan ta parse mas di un “Hater in Chief” refiriendo na un hefe di estado di odio.
Alkaldesa Carmen Yüli Cruz a agregá ku “Trump no ta kapas di kumpli ku e imperativo moral di yuda e pueblo di Puerto Rico.
Esaki a pasa miéntras Kámara di representante tabata preparando pa respaldá un pedido di Trump pa pone 36.500 mion dòler liber, inkluyendo yudansa pa mantené e gobièrnu di Puerto Rico.
Maria a kousa 45 morto na Puerto Rico. Kasi 85% di residentenan riba e isla ainda no tin elektrisidat i gobièrnu ta bisa ku nan ta spera di por restourá e servisio kompletamente pa mart otro aña.
