ELLESBOROUGH, INGLATERA, AP.- Presidente merikano Donald Trump a ninga djabièrnè di a kritiká e promé minister britániko Theresa May i a sostené ku e relashon entre ámbos nashon ta “mas ku spesial”, algu despues di a ataká e mandatario ku un andanada i krítika den un diario lokal.
E bishita di Trump den Reino Uní, a wòrdu karakterisá pa protestanan i un entrevista di Trump na diario The Sun, kaminda el a kritiká su anfitrion May, kulpa e alkalde di Londo pa atakenan terorista den e siudat i a sostené ku Europa “ta pèrdiendo su kultura” debí na inmigrashon.
“Mi no a kritiká e promé minister. Mi tin hopi rèspèt pa e promé minister”, asina Trump a bisa despues di rekonosé ku el a ofresé su diskulpanan pa algun deklarashon, pero a kulpa ‘prensa falsu’ di no a publiká e elogionan ku el a hasi na May den un entrevista publiká djaweps, promé ku e promé minister a brinda Trump un sena di bonbiní den un palasio.
E presidente a pidi periodistanan pa skucha tur entrevista pa asina haña e panorama kompleto.
May a elogiá e fortalesa di e relashon entre e dos paisnan. Pa loke ta su relashon ku Trump, el a bisa: “nos ta amigu”.
Trump, kende a vinkulá su triunfo elektoral ku e referèndem den yüni 2016 kaminda un mayoria chikitu a vota na fabor di Brexit, el a bisa ku e akuerdo ku May ta purbando di drenta ku Europa ta diferente na e loke e pueblo a vota p’e.
