WASHINGTON, AP.- E gobièrnu di presidente Donald Trump a reiterá su menasa di imponé impuesto di 25% na 50.000 miónes di dòler di merkansia chines ku ta kontené “teknologia industrialmente importante” den represaya ku ta wòrdu konsiderá komo práktikanan komersial inhustu di parti e pais asiátiko.
E gobièrnu kier restringí e invershon chines den Merka i limitá eksportashonnan merikano di produktonan di teknologia chines, segun informashon di Kas Blanku djamars.
E anunsio ta intensifiká un konfrontashon komersial riesgoso entre e dos ekonomianan mas grandi na mundu. E sekretario di komersio Wilbur Ross mester biaha djasabra pa Beijing pa asina partisipá na e kòmbersashonnan.
Kas Blanku a bisa ku e impuesto ta wòrdu apliká na teknologia, inkluyendo esun ku China a bisa ku kier pa dominá parti di su programa “Made in China 2025”. Bou di e programa aki, Beijing tin e ophetivo di tuma un sitio dominante di teknologia den desaroyo riba áreanan manera inteligensia artifisial, robótiko i outonan eléktriko.
E anunsio di e lista kompleto di artíkulonan ku lo haña e impuesto aki lo wòrdu publiká 15 di yüni, segun informashon di presidensia merikano.
Trump a bisa ku e défisit komersial enorme di Merka ku e pais asiátiko di 337.000 dòler aña pasá, ta prueba ku Beijing tabata kómplise di práktikanan komersial abusivo.
