WASHINGTON, AP.- Esaki ta un marka ku niun hende ta deseá: Donald Trump ta konkluí su promé aña komo presidente ku índise di aprobashon mas abou registrá den e promé aña di Kas Blanku.
Asina e enkuestador Gallup a indiká, segun kual Trump a registrá un aprobashon promedio di 39%. E presidente mas impopular despues di e promé aña te awor tabata Bill Cinton, kende su promedio di e promé aña tabata dies punto mas haltu, di 49%.
Konsultanan resien a indiká ku e merikanonan ta konsiderá ku Trump ta un figura ku ta generá divishonnan i asta ta kuestioná su aptitutnan pa goberná. Un di e poko sektornan ku e ta manehá bon, segun enkuestanan, ta e ekonomia. Asta riba e tereno aki tin indikashonnan di aprobashon relativamente abou.
No tin masha nota positivo den e promé aña di Trump, pero tin algun. Por ehèmpel, gran parti di e republikanonan ainda ta sostené. 83% di votadónan ku a wòrdu identifiká komo republikano tin un imágen positivo, segun un konsulta resien di Quinnipiac.
E mesun konsulta ta señalá ku e votadónan ta konsiderá Trump komo un persona fuerte i inteligente.
E indikashonnan di aprobashon di su maneho di ekonomia tabata esnan mas haltu kompará ku esun di su maneho general.
Den desèmber, un enkuesta di Assoicated Press-NORC Center for Public Affaird Research a indiká ku e índise di aprobashon di maneho di ekonomia tabata ocho punto mas haltu ku esun di su maneho general.