WASHINGTON, AP.- E gobièrnu di Donald Trump a aprobá kambionan importante den e forma ku ta apliká e Lei di Espesie den Peliger di Ekstinshon. Krítikonan ta bisa ku esaki lo pone hopi animal mas den peliger.
Lei di Espesie den Peliger di Ekstinshon ta rekonosé pa yuda salba mayoria animal i mata den peliger di ekstinshon desde ku presidente Richard Nixon a promové e lei na aña 1973.
Trump su atministrashon ta bisa ku e kambionan lo hasi e regulashon mas efisiente i ménos inkumbiniente. Aparte di esaki, e lei lo protehá bida salbahe tambe.
Por lo ménos 10 fiskal general a uni gruponan konservador den un protesta kontra e kambionan.
Un vershon preliminar di e kambionan lansá aña pasá ta inkluí terminashon di e protekshon general pa animalnan konsiderá den peliger i permití outoridat federal pa konsiderá e kosto ekonómiko di protehá un espesie en partikular. Un otro kambio ta permití outoridat pa ignorá e impaktonan di kambio di klima, un di e menasanan mas grandi pa habitat di e animalnan, segun gruponan di konservashon.
E lei ta protehá mas di 1.600 espesie na Merka i e pais su teritorionan.
Un informá di Nashon Uní a atvertí den mei ku mas di 1 mion mata i animal rònt mundu por disparsé, pa motibu di desaroyo humano, kambio di klima i otro menasanan.
