KAWAGOE, HAPON, AP.- E presidente merikano Donald Trump i e promé minister hapones a kompartí un almuerso informal i un wega di gòlf, na komienso di un gira den Asia. Trump mester negoshá algun tema delikado ku e gobièrnunan lokal.
E promé minister Shinzo Abe a risibí Trump pero durante próksimo dianan lo tin algun interkambio diplomátiko importante. E dos lidernan, ku a forsa un amistat, a kompartí un lùnch kasual i a hunga gòlf na Kasumigaseki Country Club, kompañá pa golfista profeshonal Hideki Matsuyama.
E ambiente informal a sirbi pa start e kòmbersashonnan formal, un konferensia di prensa i un sena di estado ku lo tuma lugá djaluna na Tokio. Abe ta deseá di kuminsá un relashon di union ku Trump kontra menasanan di Norkorea i ta deseá di haña garantia ku Merka ta kumpli ku e tratadonan firma i defendé Hapon den kaso di un atake.
Abe a papia ku reporteronan despues di e wega di gòlf i a bisa ku e tabatin e oportunidat di papia abiertamente ku Trump den un atmósfera relahante. “Nos a tene un kombersashon profundo, i asta riba temanan difísil”, segun e mandatario hapones.
Algu despues Trump a deklará ku e i Abe “ta amigu i nos paisnan ta amigu”. El a sigurá ku “mi ta kere ku nunka Merka no tabata asina serka ku Hapon manera e ta aworakí”. E mandatario a informá ku e dos lidernan a papia di un variedat di tema”inkluyendo Norkorea i komersio i otro kosnan”.
