BUCAREST, AP.- Un distrito di e kapital rumano a homenahiá ayera un grupo grandi di pareha ku a kumpli mei siglo kasá i a duna nan sèn i tambe un almuerso. E munisipio di e distrito di Bucharest a duna kada pareha ku a selebrá nan matrimonio di oro mil lei esta 255 dòler.
Mas òf ménos 600 pareha a partisipá na e almuerso siguí pa un baile den un salon dekorá ku blasnan kòrá. E muhénan a haña rosa kòrá i un banda ku a toka kansionnan romántiko tradishonal.
E organisadó Florentina Popescu a bisa ku e pareha ku mas aña kasa den e distrito tin 66 aña di matrimonio. Nan ta un ehèmpel pa tur di kiko matrimonio ta nifiká.
Silvia Agapi di 72 aña a kasa 52 aña i mei pasá. “Nos a kuminsá ku e idea ku nos ke hasi tur kos posibel pa nos ta felis ku otro”, asina el a bisa. “Nos ke ta huntu henter nos bida”. El a bisa ku ta un desepshon ku divorsio a bira algu asina komun. Dimitru i Floare Caldararu ku 55 aña kasa a bisa ku e komprenshon mutuo ta nesesario pa éksito di e pareha i ku divorsio ta den moda.
