PITTSBURGH, AP. – Pasaheronan di Uber na Pittsburgh por tira un bista den futuro pidiendo un outo ku por lidia ku mayoria tarea di maneho riba su mes.
Desde ayera mainta, Ford Fusion outónomo por buska pasaheronan di Uber ku a disidí pa partisipá den e programa piloto aki. Ounke e vehíkulonan ta kargá ku teknologia ku ta permití nabegashon independiente, un ingeniero di Uber lo ta sintá tras di stürwil pa tuma kòntròl si algu bai robes.
E programa di Uber ta esun mas resien den un kontienda kada biaha mas intenso entre kompanianan teknológiko di Silicon Valley i fabrikantenan di outo pa perfekshoná outonan outónomo pa outomobilistanan regular. Kompetidornan manera Volvo i Google a invertí algun shen mil mion dòler i ta akumulando miónes di kilometer pa tèst vehíkulonan outónomo, pero Uber ta e promé kompania den Merka pa pone esaki den disponibilidat di e públiko.
“E programa piloto aki realmente ta inisiá un adelanto den e proseso pa nos”, asina Raffi Krikorian, direktor di Uber Advanced Technologies Center (ATC) a bisa. Esaki ta e instalashon prinsipal pa tèst e vehíkulonan.
Eliminashon di kosto di e shofùr ta un forma pa hasi biahenan mas barata i mas aksesibel pa gran parti di hende.
