KIEV, UKRANIA, AFP.- Ukrania a anunsiá djárason ku a konkistá vários region bou di kontròl di trupanan ruso na sùit di e pais i ku Alemania a manda un sistema di defensa antiaéreo ku lo yuda e pais protehá kontra e kampañanan di bombardeo kontra su siudatnan.
E sekretaria general di NATO, Jens Stoltenberg, a sigurá ku e suministro di e sistemanan pa neutralisá misilnan di Rusia ta “prioridat”.
Den e último dos dianan ku a pasa, Ukrania a kai den un avalancha di misil, rakèt i drone di Rusia, komo represaya pa e atake ku eksplosivo kontra un brùg na Crimea, ku ta konektá e península aneksá pa Moscow na 2014 komo teritorio ruso.
E bombardeonan a laga 19 morto i 100 herido i dañonan grave na e infrastruktura di energia, segun outoridatnan ukraniano.
Ku yegada di e sistema Iris-T di Alemania i e próksimo entrega di NASAMS merikano, e minister ukraniano di Defensa, Oleksiy Reznikov a pronostiká “un era nobo di defensa aéreo”.
Presidente franses Emmanuel Macron, kende a anunsiá yudansa militar pa Kiev, a bisa ku Putin mester para e guera i sigui negoshá. “Nos no ke un guera mundial”, asina e presidente a añadí.
