DEN HAAG, ULANDA, AP.- Polis di Rotterdam a detené e shofùr di un wagòn ku plachi number di Spaña i ku tabata karga vários tanki di gas, despues ku e siudat a kanselá un konsierto di un grupo merikano debí na un menasa. Asina e alkalde a informá.
E alkalde di Rotterdam, Ahmed Aboutaleb, a bisa den un konferensia di prensa improvisá ku polis ta interogá e shofùr spañó di e wagòn. Ekspertonan den eksplosivo di ehérsito a akudí na e sitio pa eksaminá e vehíkulo, segun indikashon di polis.
Anteriormente, e konsierto di grupo Allah-Las, di Los Angeles, a wòrdu kanselá despues ku polis Ulandes a haña un alerta terorista. Aboutaleb a bisa ku e alerta a bini di polis spañó.
E funshonario a rechasá di duna mas detaye riba naturalesa di e atvertensia òf di kua parti di Spaña el a Sali, i el a agregá ku ta demasiado trempan pa relashoná e wagòn ku e menasa dirigí kontra e evento.
Polis na Spaña ta investigando e atentadonan mortal realisá ku vehíkulo siman pasa, kaminda 15 persona a muri den Katalonia.
Polis di Rotterdam a bisa ku a tuma informashon riba e menasa “sufisientemente serio pa kanselá e konsierto, despues di deliberá ku e organisadónan.
E kompania na kargo di e organisashon di e evento, Rotown, a bisa riba Twitter ku e sala di konsierto, a wòrdu evakuá debí na e menasa spesifiká.
