WASHINGTON, MERKA, AFP.- E vakunashon kontra COVID-19 ta prioridat number un pa tur pais emergente i den desaroyo, segun indikashon di e ekonomista hefe di FMI, indikando ku retrasonan den e kampaña di vakunashon ta pone e ekonomia mundial na riesgo.
Gita Gopinath a bisa ku e káos aktual pa haña akseso na vakunanan ta “un problema grandi” ku ta sigui empeorá e pandemia. El a hasi un petishon tambe pa paisnan riku duna un parti di nan vakuna na paisnan mas pober.
Fondo Monetario Internashonal a presentá un panorama ekonómiko mas optimista pa 2021 i 2022, pero a atvertí ku e proyekshonnan aki no ta liber di insertidumbre. P’esei e institushon a kombiná su proyekshonnan ku dos alternativa: un kresementu mas lihé si e kampaña di vakunashon kana sin retraso, inkluyendo den paisnan pober, òf un kresementu mas debil komo kousa di retrasonan ku e vakunashon.
Mas o ménos binti pais, prinsipalmente den Afrika i Oceania, no a kuminsá ku nan kampaña di vakunashon.
