MERKA, AP.- Nuebe estado di Estádos Unídos lo realisá referendum dia 8 di novèmber riba normanan pa benta legal di mariwana. Esaki ta e temanan mas importante: Den 5 estado, e konsulta ta inkluí tema di si por permití mariwana pa uso rekreashonal pa mayornan di 21 aña.
Na Arizona: Lo disidí riba e proposishon “205”, un inisiativa ku lo permití mayornan di edat kultivá un máksimo di 6 mata. Lo rekreá un departamento ku lo regulá e droga komo alkohòl i lo apliká impuesto di 15 % na bentanan pa rekoudá fondo pa e munisipionan, skol i departamentonan di salubridat. Republikanonan i sosionan di negoshi ta oponé na e medida aki.
Na California: Lo disidí riba e proposishon “64”, ku lo permití poseshon di 1 òns di e droga, e kultivo di un máksimo di 6 mata i aplikashon di impuesto riba benta pa benefisiá programanan kontra adikshon i pa restourá dañonan hasí na medioambiente kousá pa e kultivo di mariwana
Na Maine: Lo disidí riba un proposishon ku lo permití poseshon di 2 òns i mei di mariwana i kultivo di un máksimo di 6 mata i riba aplikashon di impuesto di 10% riba benta. Partidarionan di mariwana ta oponé pa finnan di uso medisinal, inkluso e kultivadó nan lokal chikí ta teme di keda desplasá pa korporashonnan grandi si legalisá den su totalidat e benta di e droga en kuestion aki.
Na Massachusetts: Ta debatí e legalisashon di tin den posishon di un máksimo di 1 òns di mariwana pa finnan rekreashonal i kultivo partikular na un kantidat limitá di mata. E benta di produkto lo tin un impuesto di 3.75% riba e impuesto general di benta, tambe lo krea un komishon pa regulá komersio. Na Nevada: Aki ta debatí e mesun posishon i uso di un máksimo di 1 òns di mariwana i un impuesto di 15% riba benta pa benefisiá programanan edukativo. Durante e promé 18 lunanan por solisitá solamente lisensia di negoshi ku ta konta ku sertifikashon pa bende mariwana pa finnan medisinal.
