CARACAS, AP.- Partido opositor Akshon Demokrátiko, un di esnan mas grandi i antiguo di Venezuela, a anunsiá djamars ku a ekskluí kuater gobernador ku a hurá dilanti di Asamblea Konstituyente.
Henry Ramos Allup, sekretario general di e partido, a informá na prensa ku ta ekskluí Laidy Gomez, Antonio Barreto Sira, Alfredo Diaz i Ramon Guevara, gobernadornan di Tachira, Anzoategui, Merida i Nueva Esparta, respektivamente.
E anunsio a tuma lugá un dia despues ku kuater di e sinku gobernadornan opositor skoh’e den elekshon di 15 di òktober a presta huramentu dilanti di Konstituyente, integrá kompletamente pa ofisialistanan.
Juan Pablo Guanipa, skohe den estado di Zulia i militante di Primero Hustisia, no a akudí na e seremonia di huramentashon djaluna.
Mesa di Unidat Demokrátiko, un aliansa integrá pa kasi tres desena di partido opositor, a antisipá ku e gobernadornan lo no presta huramentu na Konstituyente debí ku e ta wòrdu konsiderá komo inkonstitushonal.
Promé ku elekshon presidente Nicolas Maduro a atvertí ku esnan ku resultá ganadó mester supordina na e organismo aki pa asina asumí nan kargonan. Si nan no hasi esaki, e lo organisá elekshon di nobo den e estadonan.
