CARACAS, AP.- Outoridat venezolano a detené un supuesto integrante di e grupo delinkuente kolombiano, kende a paresé riba un potrèt ku e lider opositor Juan Guaidó, segun indikashon di e gobièrnu djabièrnè.
E minister di Komunikashon, Jorge Rodriguez, a indiká ku forsanan di seguridat a kapturá Ivan Posso den estado di Zulia. E sospechoso, alias Nandito ta supuesto integrante di e grupo kriminal “Los Rastrojos”.
Rodriguez a publiká un video deklarando ku Posso a rekonosé ku “Los Rastrojos” a sigurá “siguridat i transporte di mener Juan Guaidó”.
E minister a agregá ku e hefe di Guaidó su despacho, Roberto Marrero a plania traslado di e lider opositor for di Venezuela pa Colombia, pa asina e partisipá den un konsierto pa rekoudá fondo riba 22 di febrüari na Cucuta. Marrero ta detené for di mart.
Fiskal Tarek William Saab a informá siman pasa, ku Ministerio Públiko a kuminsá ku un investigashon kontra e lider opositor pa determiná su supuesto relashon ku e grupo kolombiano.
Guaidó a wòrdu rekonosé komo presidente interino di Venezuela pa mas di 50 pais ku ta konsiderá e nombramentu di presidente Nicolás Maduro komo unu ilegal. Guaidó a bisa ku el a saka hopi potrèt durante su travesia pa Cucura i a bisa ku ta “difísil pa deskriminá esun ku pidi pa saka potrèt”.
