CARACAS, VENEZUELA, AP.- E kansier venezolano Delcy Rodríguez a rechasá djárason un video di e kampaña di partido demókrata merikano kaminda ta kompará e magnate Donald Trump ku Hugo Chavez, e eks presidente karakterisá pa un gobièrnu outoritario kaminda el a denominá sosialista i ku el a oponé intensamente kont ra Washington. Kompará Trump ku Chávez ta un ekspreshon di “arogansia i rasista i irashonal”, Rodríguez a afirmá den su kuenta di Twitter. Den e video, ku e kansier a tilda di ta “atros i malbado” ta resaltá supuesto similaridatnan entre retóriko di Chávez i di e kandidato republikano Donald Trump en kuantu su trato ku prensa i menasanan ku prosesonan hudisial na su krítikonan, entre otro tópikonan. E krítikonan di Chávez semper a katalog’é komo un gobernante outoritario pero hopi sabi, ku tabata utilisá speransa di pobernan, su enfrentamentunan verbal frekuente ku e gobièrnu merikano i su menasanan na medionan di komunikashon pa optené benefisionan polítiko.
Pero algun di e krítikonan di Trump a atvertí ku su intenshonnan ripití pa presentá komo e úniko kapas na resolvé problemanan sosial ta parse mas na e retórika di gobernantenan outoritario manera Chávez i e kubano Fidel Castro. E senador iskierdista Bernie Sanders -ku den pasado a ekspresá sierto simpatia pa Chávez- a modifiká su posishon durante su kampaña den primarianan di e Partido Demókrata, den loke e ta deskualifiká e eks gobernante suramerikano komo “un simpel diktador komunista”. Rodríguez a manifestá tambe ku e kampaña elektoral merikano kaminda Trump i Clinton ta enfrentá otro ta refleho e krísis étiko profundo, moral i polítika den un sistema degradá ku ta bira lomba pa e pueblo”.
