HONG KONG, AP.- E multitut riba kareteranan friu i skur di Hong Kong no tabata parti di e manifestashonnan antigubernamental ku ta afektando e teritorio semi outónomo chines ya pa algun luna aki.
E manifestantenan no a eksihí ningun reforma polítiko pero mas bien un masker, kual ta birando skars komo konsekuensia di e furor ku e vírus a kousa i mata mas di mil persona na China i unu na Hong Kong.
E manifestashonnan a pèrdè forsa den e último dos lunanan te kaba na praktikamente nada. Tur atenshon ta enfoká riba e forma kon pa evitá un ripitishon di loke a pasa ku e brote SARS di 2002-2003, kual a mata 300 persona na Hong Kong.
Mayoria di e demandanan no a wòrdu satisfasé i ta demasiado trempan pa bisa ku e protestanan a kaba.
E frekuensia i intensidat di e manifestashonnan a baha despues di e viktoria abrumador na fabor di demokrasia den elekshon munisipal den novèmber. e votamentu a representá un kondena fuerte pa e gobièrnu di Carrie Lam i a wòrdu siguí pa un periodo relativamente trankil.
Míles di persona a protestá riba 8 di desèmber pa partisipá den un marcha pasífiko i preshoná e gobièrnu pa aseptá su demandanan pa un demokrasia pleno. Aparte di esaki, e manifestantenan kier pa gobièrnu investigá e denunsianan di brutalidat di polis kontra e manifestantenan.
