BEIJING, AP.- E siudat Wuhan lo suspendé tur buelo i trein ku ta sali di aki, miéntras China ta lidia ku e brote di un vírus nobo ku a afektá sentenares di hende i provoká morto di 17, segun informashon di medionan estatal chines.
E agensia di notisia ofisial Xinhua a señalá ku e siudat a pidi su hendenan pa no bandoná Wuhan sin un motibu spesífiko.
E korant estatal People’s Daily a tweet ku lo no permití niun hende pa bandoná e siudat desde djaweps 10or di mainta i ku tur stashon di trein i e aeropuerto lo suspendé su aktividatnan. E korant a agregá ku busnan, metro, fèri i trùknan ku destinashonnan tambe mester stòp di operá temporalmente.
E Organisashon Mundial di Salú a informá ku lo aplasá e desishon pa deklará e brote komo un emergensia di salú internashonal i a pidi su komité di eksperto pa sigui elaborá riba e tema aki den un reunion awe. OMS ta definí tur emergensia global komo un “evento ekstraordinario” ku ta riesgoso pa otro paisnan i ku mester di un koordinashon internashonal.
Outoridat di salu chines a pidi e pueblo di Wuhan pa evitá tur multitut i aglomerashon, atvirtiendo ku e coronavirus aki por sigui propagá.
E kantidat di kasonan nobo a oumentá drástikamente na China, kual ta e episentro di e brote. Diesshete persona a muri desde ku e brote a surgi den kapital provinsial di Wuhan na final di desèmber, segun indikashon di outoridat djárason. E provinsia a konfirmá 444 kaso einan.
