SAN FRANCISCO,USA (AFP).- Presidentenan di Merka, Joe Biden, i di China, Xi Jinping, a yega San Francisco ayera, kaminda for di awe nan lo topa otro den un reunion hopi sperá na momento ku tin frikshon entre e dos paisnan.
Biden a yega poko despues di mèrdia den e siudat kaminda lo e ta na kabes di e kumbre anual di Foro di Koperashon Ekonómiko Asia-Pasífiko (APEC), i a keda risibí pa e gobernador di California, e tambe demókrata Gavin Newsom.
E gobernador tambe a duna bon biní na Xi, kende a yega ku avion presidensial algun ora despues di Biden. E mandatario chines a keda risibí tambe pa e sekretaria di Finansa norteamerikano, Yanet Yellen.
E enkuentro entre Biden i Xi, e promé den un aña, ta konsiderá komo krusial pa baha tenshon i tene bou di kontrol e rivalidat entre e dos super potensianan.
Mas trempan ayera Biden a trese dilanti ku Merka no ta buska pa distansiá di China, sino di tin un mihó relashon.
Puntrá riba su espektativanan pa e enkuentro hopi sperá, Biden a bisa di ke “regresá na un ritmo normal di korespondensia, kaminda nos ta dispuesto pa tene kontakto via telefòn i papia si tin un krísis”.
John Kirby, bosero di Konseho di Seguridat Nashonal di White House, a bisa na medionan ku ámbos presidente “konosé otro hopi bon pa un bon tempu kaba i ku nan por ta franko i dirèkt ku otro”.
