HONOLULU, AP.- Un avion ku ta wòrdu usá pa parakaidismo a kai i sende na kandela, un ratu despues ku el a lanta na kosta di isla Oahu. E 11 okupantenan a fayesé segun informashon di outoridat djasabra.
Inisialmente a reportá ku nuebe persona a pèrdè nan bida den e insidente djabièrnè i ku e mortonan tabata kliente di un kompania di parakaidismo i seis tabata empleado.
Sinembargo, Departamento di Transporte na Hawaii a konfirmá ku tabatin 11 persona den e avion i ku ningun no a sobrebibí. E avion Beechcraft King Air a lanta for di Dillingham, na kosta nort di e isla.
Despues ku e avion a lanta, el a dal un buèlta pa regresá bek, pero el a pasa riba algun palu i kai despues, segun un testigu, Steven Tickemeyer.
“Nos a presentá na e sitio algun minüt despues, i e avion kompleto tabata na kandela”, asina el a agregá.
E avion a eksperensia un insidente teribel den yüli 2016, i e 15 parakaidistanan na bordo mester a bula for di e avion pa salba nan mes, segun dokumentonan di gobièrnu. Na e okashon aki, e avion a pèrdè kontrol na tres okashon i dal vários bògt promé ku e piloto e logra aterisá esaki, segun e Hunta Nashonal di Seguridat i Transporte durante e informe di su investigashon. E agensia a atribuí loke a pasa ta eror di e piloto.
