YAKARTA, INDONESIA, AP.- Por lo ménos 14 persona a fayesé i mas di 160 mas a resultá heridá pa un temblor ku un magnitut di 6,4 ku a asotá e isla indones Lombok. Esaki ta un destino turístiko popular serka di Bali, djadumingu mardugá, segun indikashon di outoridat.
E temblor a daña mas di 1.000 kas i a wòrdu sintí den e zona kompleto, inkluyendo Bali, kaminda no a reportá dañonan material ni humano.
E servisio geológiko di Merka a informá ku e temblor a wòrdu registrá ku un profundidat di 7 kilometer. E movishonnan superfisial normalmente ta kousa mas daño ku esnan profundo, manera tabata e kaso djadumingu.
E distrito di Lombok Oriental tabata esun mas afektá ku 10 morto, den kual tabatin un siudadano malasio, segun indikashon di e bosero di e Agensia pa Desaster di Indonesia, Sutopo Purwo Nugroho. E konteo di víktima por oumentá ta ku ainda outoridat ta kolektando i analisando datonan di otro zonanan di e isla, segun el a agregá.
Ademas, 162 persona a resultá herida, inkluyendo 67 ku a wòrdu hospitalisá ku leshonnan grave, segun indikashon di e bosero.
E temblor a provoká algun blackout den distritonan di Lombok Oriental i Nort i a provoká un avalancha di lodo den Minte Rinjani. Ekiponan di reskatá e evakuá mas di 800 turista den serunan.
