HONOLULU, AP.- E plan di biaha desde Hawai pa Tahiti na bordo di un boto di bela di 15 meter no a Sali bon pa e muhénan di Honolulu. Un di nan selular a kai den laman riba e promé dia.
Di ei pa dilanti, tur kos a keda bira mas pió.
Mas o ménos un luna despues di e komienso di e biahe, awa a daña un motor. E mast di 17 meter tambe a sufri daño. Desde e momentu aki, nan a flota dor di míles di kilometer loke a resultá den un biahe di sinku luna den pasífiko, ku e purifikadó di awa daña i tribonnan atakando e barku.
Diariamente, durante 98 dia, e muhénan a manda un señal di yudansa, sin haña kontesta.
Pero e dos muhénan, kompañá pa nan kachó, a aktua sabi i tabata bon prepará, ku suministro di kuminda pa mas di un aña i djárason finalmente nan a wòrdu reskatá pa Marina merikano 1.450 kilometer leu di Hapon i míles di kilometer leu di su destino.
USS Ashland a rekohé Appel i Tasha Fuiava despues ku un barku di peska Taiwanes a mira su belero djamars i a alerta Warda Kosta di esaki.
Riba potrèt i videonan proveé pa armada, un di e muhénan a tira sunchi miéntras un boto di reskate tabata aserkando. Ámbos muhé i nan kachónan, Valentine i Zeus tabata mustra bon.
Kontestando e pregunta, si nan a pensa ku nan lo no sobreviví, Appel a bisa ku nan lo no ta humano si no tabata asina. El a duna krédito na e kachónan pa yuda nan mantené bon ánimo.
Appel, eksperto marinero, a bisa ku Fuiava no a nabegá nunka promé ku e biahe. Ámbos a Sali na komienso di mei riba un travesia di 4.345 kilometer, pero a pèrdè motor meimei di un tormento na final di e luna.
Nan a pensa ku nan por a yega Tahiti ku e belanan, pero e dañonan ku mast a sufri a difikultá e travesia aki.
