MILAN, AP.- Djamars un viadukto serka di e siudat di Genova a kolèps na nort di Italia. Esaki a laga por lo ménos 20 morto segun indikashon di outoridat.
Tur e víktimanan tabata den e vehíkulonan ku a kai for di e brùg, segun indikashon di e funshonario. El a agregá ku dos depósito bou di e kaminda tabata será debí na un feria, i p’esei no tabatin ningun persona den esaki.
E hefe di defensa sivil italiano Angelo Borreli a bisa den un konferensia di prensa na Roma ku e ingenieronan tabata verifikando e estado di e viadukto i tabata evakuando algun zona pa prekoushon.
E ofisial di bombero Amalia Tedeschi a bisa na e kanal di televishon estatal RAI ku binti vehíkulo, entre otro outo i trùknan, a wòrdu afektá pa e insidente aki. El a agregá ku dos persona a wòrdu reskatá ku bida di e vehíkulonan.
Tedeschi a bisa ku kachónan entrená pa buska víktima entre ruina tabata yuda i ku e parti di e viadùkt ku a kolèps tabata 80 meter largu. Informenan di prensa anterior a bisa ku esaki tabata 200 meter.
E desaster a tuma lugá riba un outopista ku ta konektá Italia ku Fransia pasando via vários resort. Awe ta Ferragosto, un feria total na Italia, i e tráfiko tabata mas intenso ku normal debí na e kantidat grandi di hende ku ta bishitá playa òf serunan.
E minister di Transporte, Danilo Tininelli, a bisa ku “esaki tabata un tragedia enorme”.
E minister di Interior, Matteo Salvini, a bisa ku mas o ménos 200 bombero a akudí e sitio.
E brùg Morandi, inougurá na 1967, tin 90 meter di altura, 1.000 meter largu.
Esaki ta un ruta ku ta wòrdu usá frekuentemente debí ku e ta konektá A10 di Fransia i A7 ku ta sigui pa Milan.
Outoridat ta pensa ku e kousa di e insidente tabata un debilidat struktural, segun ANSA.
