QUITO, AP.- Por lo ménos 27 persona a muri i 127.500 mas a wòrdu afektá for di yanüari pa e áwaseru fuerte di invierno kual a kousa inundashon den partinan di Ecuador.
Sekretaria di Riesgo a informá djárason ku 13 di e mortonan a wòrdu registrá durante último 30 dia i ku e provinsianan mas afektá ta Guayas i Manabi, den zona di kosta sentral.
E mal tempu, karakterisá pa áwaseru fuerte, a okashoná daño riba kamindanan prinsipal i a kousa inundashon den siudatnan manera Quito.
Presidente Rafael Correa, a bishitá Manabi djamars, ku a wòrdu asotá pa un temblor poderoso di 7,8 grado un aña pasa. Awor esaki ta afektá pa inundashonnan ku den algun sitio a yega na 1,5 meter di awa. E pueblo ta obligá pa move den kanoa debí na e inundashonnan aki. Correa a informá ku tabatin un perdida di sigur 7.000 hèktar di kultivo den e área.
For di komienso di aña, Ecuador, Colombia i Perú a wòrdu afektá pa un periodo di áwaseru inusual i fuerte debí na un kalentamentu di awa den oséano pasífiko, segun ekspertonan.
E organismonan meteorológiko di Ecuador ta antisipá ku e áwaseru aki por prolongá te ku mei.
