SAN JUAN, AP.- Por lo ménos tres persona a muri i 44 a resultá leshoná despues di un eksploshon registrá djárason den un fábrika di plèstik na Santo Domingo, kapital di República Dominicana, segun informashon di outoridat.
Entre e heridonan tabatin 13 mucha ku a asistí e skol ku ta keda dilanti e kompania Polyplas, kaminda e eksploshon a tuma lugá, segun indikashon di Maria Gomez, bosero di Servisio Nashonal di Salú den e pais.
Alkalde David Collado a komentá na reporteronan ku e kandela a kuminsá despues di un eksploshon den e fábrika, kual ya keda den sektor di Villas Agricolas. El a agregá ku e kandela a wòrdu kontené.
E teniente di polis Jose Fransisco Velez a komentá ku outoridat a sigui buska mas víktima bou di e ruinanan di betòn.
Entre e heridonan tabatin tres adulto den kondishon grave, ku kemadura di segundo i terser grado. Gomez a señalá ku e personanan herida a wòrdu atendé den vários hospital den e kapital. Algun operashon mester a wòrdu posponé pa manehá e pashèntnan nobo.
