QUITO, AP.- Por lo ménos un lider indígena i kuater persona mas a muri durante manifestashonnan kontra e gobièrnu di Ecuador. E protestanan a kuminsá un siman pasá, despues ku e gobièrnu a apliká un serie di medida ekonómiko, segun Defensor di Pueblo.
Sinembargo, outoridat ta indiká ku tin solamente dos morto registrá den un aksidente i no komo resultado di e konfrontashonnan. Outoridat a anunsiá ku a detené por lo ménos 17 persona, mayoria venezolano, ku a partisipá den e protestanan.
E gobièrnu di presidente Lenin Moreno ta kulpa eks mandatario Rafael Correa i e gobernante venezolano Nicolás Maduro di ta responsabel pa e káos i e krísis polítiko i sosial den e pais.
E presidente di Konfederashon di Nashonalidat Indígena, Jaime Vargas, a bisa djaweps ku lo intensifiká tur protesta te ora ku e gobièrnu tuma medidanan ekonómiko.
Moreno a trasladá e sede di gobièrnu pa Guayaquil i a atvertí ku e lo no apartá di su desishon pa eliminá supsidio riba tur kombustibel.