ROMA, AP.- Por lo ménos 8.300 migrante a wòrdu reskatá di botonan peligroso di kontrabandistanan fin di siman den mediteráneo, segun indikashon di Nashon Uní djaluna.
E bosero di agensia di refugiadonan di Nashon Uní, Carlotta Sami, a informá ku “ekiponan di reskate a traha sin stòp” djabièrnè, djasabra i djadumingu pa salba e personanan aki. Ocho migrante a muri, inkluyendo un muhé na estado.
E kontrabandistanan ta probechá di laman trankil pa sali ku hopi boto. Esnan reskatá a wòrdu transferí pa botonan nabegando den sùit di Italia. Mayoria ta buska asilo, pero esnan ku ta emigrá simplemente pa motibu ekonómiko probablemente no ta haña asilo.
Mas di 1.400 di esnan reskatá a wòrdu salba pa un agensia europeo na frontera i warda kosta Frontex, ku a bisa di a partisipá den 13 operashon fin di siman.
Organisashonnan humanitario privá tabata involukrá den mayoria operashon di reskate, miéntras wardakosta Italiano a koordiná e esfuersonan.
