CHIMANIMANI, ZIMBABWE, AP.- Ekiponan di reskate a reskatá damnifikadonan pegá den palu i riba dak, despues ku un siklon a kousa inundashon na Mozambique, Zimbabwe i Malaui. A konfirmá mas di 350 morto, ademas ku a reportá vários persona pèrdí i míles mas den peliger.
Na Mozambique, e inundashon a pone vários famia na peliger, segun indikashon di ekiponan di reskate, miéntras nan tabata purbando di realisá reskatenan i tira kuminda i awa pa e sobrebibientenan desde ariba.
“Esaki ta e krísis humanitario mas pió den historia resien di Mozambique”, segun indikashon di Jamie LeSueur, hefe di ekipo reskate di International Red Cross and Red Crescent Movement.
E presidente di Mozambique, Filipe Nyusi, a bisa djamars an ochi ku el a konfirmá morto di mas di 200 persona den su pais. Anteriormente el a komentá ku e kantidat di morto por oumentá na un miar.
Por lo ménos 400.000 persona tabata sin kas.
E siklon a tuma e residentenan pa sorpresa i a krea un di e inundashonnan mas destruktivo den 20 aña, segun ekiponan di emergensia. E kondishon di áwaseru fuerte lo kontinuá te ku djaweps.
Mayoria zona ainda ta intransitabel. Debí ku e kareteranan prinsipal a wòrdu eliminá di mapa, e gruponan di yudansa a pura ehekutá e labornan di reskate via laira i laman.