NEW YORK, AP.- Un korte di apelashon na New York a bai di akuerdo pa duna 6,7 mion dòler di indemnisashon na 21 artista di grafiti na Merka, Oustralia, Hapon, Brasil i Colombia, dor ku nan pinturanan riba un muraya famoso a wòrdu destruí pa habri kaminda pa konstruí kasnan luhoso den e área.
Korte di Apelashon di segundo Distrito djaweps a konkluí ku un hues a aktua korektamente dor di kobra daño i perhuisio di e desaroyadonan ku a destruí e obra di aerosol na aña 2013. E korte di apelashon a bisa ku e akshon a violá e lei di Derecho di Artista Visual di 1990, kual ta protehá e arte ku a haña hopi atenshon durante vários aña.
E sitio kaminda e grafitinan tabata den e bario di The Long Island City, den distrito di Queens, konosí komo 5Pointz, tabata un atrakshon turístiko ku a atraé míles di bishitante diariamente kual a paresé den e pelíkula di 2013 “Now Your See Me”.
“Den añanan resien ‘street art’, kual mayoria biaha ta ‘temporal’, a surgi komo un kategoria importante di área kontemporáneo”, segun indikashon di hues Barrington D. Parker.
Desde 2002, e murayanan a sirbi komo e base pa 10.000 obra di arte. Algun tabata temporal i a deshasí di algun pero ku pèrmit di e artistanan.
Pero e desaroyadonan a destruí e arte i asta impedí e kreadornan di yega e zona òf rekuperá e obranan ku a wòrdu retirá.
E hues a duna un kompensashon enorme, mas di loke ta normal konkluyendo ku e destrukshon di e arte tabata intenshonal dor ku e artistanan no a haña e oportunidat ku lei ta ofresé, kual ta duna nan tres luna pa reskatá e obranan.
Un abogado di konstrukshon a ninga di hasi deklarashon.
