STRESA, ITALIA, AFP.- E kaida di un kabina telefériko djadumingu a provoká morto di 14 persona na Stresa, un lokalidat den e region italiano Piamonte na kantu di lago Mayor, segun servisio di reskate.
Despues di anunsiá un “konteo definitivo” di 13 morto, servisio di reskate a anunsiá ku un di e dos menornan di edat gravemente herida, un mucha di nuebe aña no a sobreviví su heridanan i el a fayesé.
Segun e diario II Corriere della Sera, tin turistanan aleman entre e víktimanan. e informashon no a keda konfirmá pa ofisialnan. Presidente italiano Sergio Mattarella i promé minister Draghi a ekspresá kondolensia na famia i sernan kerí di e víktimanan.
E aksidente a sosodé alrededor di mitar di 1 di mèrdia i tabata 100 meter leu di e último stashon telefériko. E kabina ku 15 hende aden posiblemente a kai pa motibu ku un kabel a kibra.
E kabina a kai for di un altura di 15 meter i despues a bòltu vários biaha i dal den un palu. E telefériko popular ta konektá e pueblo di Stresa ku monte Mottarone den 20 minüt. E rekorido ta kubri kasi 1.500 meter i ta ofresé un bista espektakular di Alps i lago Mayor.
E kabina tabata serka di yega Mottarone. Sin embargo, na un dado momentu el a kuminsá bai atras, segun indikashon di e alkaldesa di Stresa, Marcella Severino.
