FORT MYERS, MERKA, AFP.- Orkan Ian a kousa hopi daño na Florida djaweps ku besindarionan kompleto redusí na ruina òf destruí i laga miónes sin koriente. Ademas, presidente merikano Joe Biden e atvertí ku e kantidat di morto por ta haltu.
E orkan, un di esnan di mas fuerte ku a gòlpia Merka, a bira bai den direkshon di South Carolina despues ku esaki a asotá e estado na kosta sùit, kaminda mayoria residente ta wardando pa keda reskatá den nan kasnan inundá.
“Esaki por bira e orkan di mas mortal den historia di Florida”, asina Biden a bisa despues di un seshon informativo na sede di maneho di emergensia FEMA, na Washington.
El a añadí ku e kantidat di morto no ta ofisial, “pero nos a skucha informenan ku posiblemente ta trata di un pèrdida sustansial di bida”.
E gobernador di Florida Ron DeSantis a deskribí e destrukshon na sùitwèst di e estado komo un “evento di inundashon di 500 aña”.
Funshonarionan a konfirmá por lo ménos seis morto, pero e kantidat por oumentá konsiderablemente segun ekiponan di reskate ta wòrdu desplegá den regionnan afektá.