VIENA, OUSTRIA, AFP.- E kombersashonnan riba e akuerdo nuklear iraní a reanudá diskretamente ayera na Viena, ku e speransa di ku e paisnan oksidental lo yega na un akuerdo den e próksimo simannan.
E diferente delegashonnan a bolbe e kapital oustriako pa selebrá un seri di reunion den palasio Coburgo, e hotèl di luho kaminda ta tumando lugá e diskushonnan entre Iran i e otro partidonan relashoná ku e akuerdo (Alemania, China, Fransia, Reino Uní i Rusia).
Na su yegada, e negoshadó iraní Ali Bagheri no a bisa ni un palabra na prensa. E kordinadó di Union Oropeo Enrique Mora ku ta supervisando e proseso i ta informando e merikanonan presente na Viena ounke no ta direktamente partisipá, tampoko a bisa nada.
Despues di e último reunion na yanüari, e diplomátikonan a pidi desishonnan polítiko despues di e avansenan realisá durante di e luna, ku a kibra un bloke largu. For di Washington, e hefe di diplomasia di Union Oropeo, Josep Borrell a mustra e speransa di un resultado rápido, ounke ta sigui eksistí diferensianan importante.
