TEXAS, AP.- E hòmber ku outoridatnan a identifiká komo esun responsabel pa a tira den un misa na Texas, a keda baha di rango di forsa aéreo despues ku el a ataká su kasa i yu asina un bosero di armada a informá.
Devin Kelly tabata sera 12 luna despues di huisio militar na 2012 asina e bosero Ann Stefanek a indiká. El a bisa mas aleu ku na final Kelley a keda baha di rango di forsa aéreo pa mal kondukta.
E bosero a bisa mas aleu ku Kelley a traha den e departamento logístiko di base aéreo Holloman na New México for di 2010 te ora nan a bah’e na 2014. Den e puesto ei e tabata enkargá ku transporte di pasahero, karga i propiedat priva den transportenan militar.
Outoridatnan no a duna nòmber di e hòmber den un konferensia di prensa ku a tene riba loke a sosodé i solamente a bisa ku ta trata di un hòmber kolo kla di mas òf ménos binti piko aña. Pero un funshonario federal i un ofisial di polis a papia ku The Associated Press i a identifik’é komo Kelley kende djadumingu a tira den un misa di First Baptist Church di Sutherland Springs, kousando 26 morto i mas di 20 herido.
E funshonario federal a pidi pa no keda identifiká i a bisa na The Associated Press ku Kelley a biba den un suburbio di San Antonio i ku e no ta pertenesé na niun grupo terorista.
El a agregá ku e investigadónan tabata buskando den su mensahenan mas resien i riba ret sosial inklusive un mensahe kaminda e tabata karga un arma semi outomátiko tipo AR 15 pa mira kiko por haña pa e kaso.
Johnnie Langendorff a bisa ku e tabata den su trùk bayendo pa buska su frei na Sutherland ora un hòmber pia abou a los bala kontra outor di e matansa den e misa, a subi su trùk i bisé “nos tin di gar’e”.
Momentunan despues nan a persiguí e outo di Devin Patrick Kelley di 26 aña ku segun polis a mata 26 hende i heridá 20. “El a subi mi trùk i bisa ku esei a kaba di los bala den misa, nos tin di gar’e i ami a bisé laga nos ban”, asina Langendorff a bisa The Associated Press.
Segun Langendorff, Kelley finalmente a pèrdè kòntròl riba su vehíkulo i a dal i e sivil armá a aserká ku koutela ku su arma ya kla pa tira pero e atakante a keda den outo sinta.
Polis a yega 5 minüt despues asina Langendorff a bisa kende no sa si e sivil a heridá Kelley den e entrenamentu.
