BRUMADINHO, BRASIL (AP).- Den un igra di solo por mira riba e foto aki Teraza Ferreira Nascimento ta koba den lodo ku ta sekando i hasiendo uso di hèrmèntnan di den hardin, pero esaki e ta hasiendo en buska di su ruman hòmber Paulo Giovane dos Santos. El a resigná ante e realidat ku probablemente e ruman hòmber aki lo ta morto seis dia despues ku un dam ku ta wanta desperdisionan di un mina a basha den otro na Brasil lagando un kantidat di hende morto i meimei di nan hopi ku no a rekuperá nan kurpa.
Miéntras tantu ta sigui ku esfuersonan di búskeda i rekuperashon, outoridatnan tambe ta trahando pa baha e lodo maron/kòrá ku tabata bayendo den direkshon di un riu chikí, esaki pa motibu ku e lodo ei tin konsentrashon haltu di heru frusá. Esaki lo por kontaminá un via importante di awa ku ta sòru pa proveé awa di bebe pa komunidatnan den sinku di e pais su 25 estadonan.
E insidente aki ku a surgi for di un siman pasa ta bou di kontrol di e Valley Mining Company i e echo ku e dam a kibra a kondusí na un laman di lodo kontaminá ku a ranka hopi kas den e aria aki di Brumadinho. Te ku awor ofisialmente outoridatnan a duna di konosé ku un 99 hende ta konfirmá ku nan a muri miéntras ku tin 259 otro ku no sa di nan paradero.
