ANKARA, TURKIA, AP.- Un avion a despistá djárason, miéntras ku e tabata aterisando na aeropuerto di Istanbul i a aksidentá riba un kampo i despues parti na vários pida. Un persona a muri i desena di persona mas a resultá herida.
E minister di Salú, Fahrettin Koca, a bisa ku por lo ménos un persona a muri i 157 mas a resultá herida i transportá pa vários hospital. Tres persona mester a wòrdu operá i dos ta den kuido intensivo. E Ministerio di Transporte a deskribí esaki komo “un aterisahe brutu”.
E dos pilotonan di e avion tambe ta entre e personanan heridá i nan kondishon ta grave, segun informashon di e kanal di televishon NTV.
E gobernador di Istanbul, Ali Yerlikaya a bisa ku e avion a aterisá den mal kondishon di klima. Outoridat a sera e aeropuerto despues di e insidente i tur buelo a wòrdu desviá pa e aeropuerto prinsipal di Istanbul.
Unidatnan di reskate a traha alrededor di e kabina ku a bòltu. Segun e website Flightradar24 ta trata di un Boeing 737 di 11 aña bieu.
E aksidente a sosodé un luna despues ku un otro avion di e mesun aerolínea, Pegasus, a despistá ku 164 persona na bordo. E aksidente a sosodé na e mesun aeropuerto pero ningun persona no a muri òf resultá herida.
