WASHINGTON, AP.- E shofùr di un outo outónomo ku a fayesé na momentu ku su vehíkulo Tesla a dal kontra un trùk, tabata biaha ku ekseso di velosidat nèt promé ku e aksidente. Asina investigadornan federal a informá djamars.
E Maneho Nashonal di Seguridat den Transporte di Merka a informá den un rapòrt preliminar ku e Tesla Modèl S tabata kore riba 74 mia pa ora, den un zona di 56 mph riba un kaminda dividí na Williston, Florida, serka di Gainesville.
E dokumento ta señalá ku e shofùr, Joshua Brown, di 40 aña i doño di un kompania teknológiko na Canton, Ohio, tabata usa e funshonnan di regulashon di velosidat i di permanensia riba kaminda na momentu di e aksidente. E funshonnan aki ta forma parti di e sistema di piloto outomátiko di e vehíkulo, pero e rapòrt NTSB no ta menshoná e sistema.
E Atministrashon Nashonal di Seguridat di Tráfiko riba Kareteranan di Merka, ku tambe ta investigá e aksidente, a bisa ku e sistema di “piloto outomátiko” tabata involukrá den e aksidente.
